KUSHTIMI I KISHËS SË SHËN KOLLIT

Me datë 29 nëntor 2008, u shugurua kisha e rindërtuar e Shën Kollit, nga Kardinal Salvatore De Giorgi, arqipeshkëv Emerit i Palermos (Itali). Ishin të pranishëm Shkëlqesia Imzot Ramiro, Nunci Apostolik, si dhe Shkëlqesitë Imzot Angelo Massafra, Arqipeshkëv i kësaj Dioqeze, Imzot Zef Gashi, Imzot Zef Simoni, Imzot Cristoforo Palmieri dhe Imzot Lucjan Avgustini; shumë meshtarë, rregulltarë dhe rregulltare, Nderonin me praninë e tyre edhe Autoritete Fetare dhe Civile. Kisha dhe oborri ishin të mbushur me qindra besimtarë. Në homelinë e tij Kardinali në mes tjerash tha:

“Një festë, kjo e juaja, veçanërisht e madhe, sepse veçanërisht e gjatë dhe e vuajtur ka qenë pritja, pas shkatërrimit të kishës së parë nga ana e diktaturës së egër komuniste, që shumë gjak e lotë ka bërë të derdhen mes jush, duke e bërë Kishën tuaj një bashkësi martirësh të fesë dhe të besnikërisë ndaj Selisë së Shenjtë. Është sikurse festa e ngjalljes dhe e fitores, pas provës së përndjekjes, të zisë dhe të vdekjes, prej të cilave ju ka liruar Zoti, sikurse kemi kënduar në psalmin përgjegjës”.

Në mbarim të Meshës Imzot Massafra dha këtë përshëndetje:

“Me kremtimin eukaristik që është duke përfunduar, sot kemi shuguruar kishën e rindërtuar të Shën Kollit. Është e vërtetë, mungon ende kompanjeli, por tashmë është bërë më e shumta...

Falënderimi im i parë i drejtohet të Shenjtërueshmes Trini: rindërtimi dhe shugurimi i kësaj Kishe është para së gjithash vepër e Saj. Vëllezër e Motra, unë, ju të gjithë, mund ta shpallim fenë tonë me të njëjtat fjalë me të cilat e kanë bërë këtë “Martirët” tanë, të cilët, para se t'i vrisnin, kanë thirrur “Rroftë Krishti Mbret”. Dhe tamam të dielën e kaluar kemi kremtuar solemnitetin e Krishtit Mbret.

Më lejoni të falënderoj në mënyrë krejt të veçantë Hirësinë e Tij, Kardinalin Salvatore De Giorgi. Faleminderit nga zemra, Hirësi, për dhuratën e pranisë Suaj sot këtu mes nesh, me të cilën na keni nderuar duke e rishuguruar këtë Tempull. Falënderoj Ipeshkvinjtë e pranishëm dhe të gjithë meshtarët që janë mbledhur përreth këtij altari. Faleminderit Autoriteteve civile dhe atyre fetare . Falënderimi im ju drejtohet edhe ju, shumë të dashur besimtarë të pranishëm, brenda dhe jashtë Kishës.

Falënderoj të gjithë bamirësit, që kanë ndihmuar për rindërtimin:

Kongregatën për Ungjillëzimin e Popujve (Propaganda Fide), organizatat gjermane Renovabis dhe Kirche in Not, Missio Pro Europa të Austrisë, Ambasadorin Silvano Pedrollo dhe bashkëpunëtorin e tij zotëri dr. Meguel Salvatore Porcaro, zotërinë Kol Cacaj, këtu i pranishëm me besimtarët shqiptarë të Nju Jorkut. Nuk mund të mos ju falënderoj edhe ju besimtarë të Shkodrës. Së fundi, falënderoj edhe ata që kanë punuar për ndërtimin material të kësaj kishe: Firmën Kolë Gjergji të Shkodrës dhe firmën Giuseppe Bellucci të Martina Franca (TA) që është marrë me amplifikacionin. Të gjithëve ju siguroj kujtimin dhe lutjen time.

Lavdi i qoftë Hyjit! Le të gëzojmë të gjithë! Ju besimtarë katolikë të Shkodrës e keni kërkuar me këmbëngulje rindërtimin e kishës së Shën Kollit si shenjë e mëtejshme e fitores mbi komunizmin që e kishte shkatërruar. Kështu sot kremtojmë edhe një shenjë tjetër të madhe të kthimit të Zotit mes nesh.

Hirësi, qyteti i Shkodrës, qendër e katolicizmit në Shqipëri, është qyteti që, ashtu siç thonë të gjithë, më së shumti ka vuajtur për shkak të diktaturës komuniste që nga viti 1945, kur filloi përndjekja e egër me vrasjen e Meshtarëve dhe Rregulltarëve, gjithmonë besnikë ndaj Krishtit dhe ndaj Kishës së Romës.

Në shkurt të vitit 1967 u shpall mbyllja e kishave dhe e vendeve të tjera të kultit. Shumë prej tyre u shkatërruan. Njëkohësisht u urdhërua edhe ndalimi absolut i ushtrimit publik të fesë dhe më pas, në vitin 1976, Kushtetuta e shpalli Shtetin ateist.

Katedralja u shndërrua në Pallat Sporti. Disa kisha në teatër, kinema apo fabrika. Kishat më domethënëse dhe përfaqësuese u shkatërruan, sikurse Shenjtërorja Kombëtare “Nëna e Këshillit të Mirë” dhe kisha e bukur e kushtuar Shën Kollit, shenjt shumë popullor në Shqipëri, kishë që ngrihej pikërisht në këtë vend ku është rindërtuar.

Ju katolikë të lagjes së Rusit, ku gjendet Kisha e Shën Kollit, e keni pritur me ankth rindërtimin e saj. Një mirënjohje e madhe i drejtohet don Ndoc Nogës për punën që ka kryer deri tani. Ai, në bashkëpunim me Imzot Frano Illinë, pastë dritë, dhe me disa laikë, arriti ta merrte përsëri terrenin në vitin 1997 dhe aty bëri që të ndërtohej një barakë, e cila ka shërbyer për katekizmin dhe për Meshën e Shenjtë deri pak kohë më parë.

Një falenderim të veçante Motrave te Kongregatës së Motrave Françeskane Misionare të Zemrës së Shenjtë, të cilat kanë bashkëpunuar me don Ndocin dhe do të vazhdojnë për të shërbyer Kishës se Shen Kollit.

Në muajin prill 2003 kemi filluar rindërtimin: kardinali Ivan Dias pati bekuar Gurin e Parë, në dhjetëvjetorin e ardhjes së Papës Gjon Pali II në Shkodër.

Sot një falënderim i drejtohet edhe Don Martin Thompson-it, Rektori i ri i kësaj kishe dhe ipeshkvit të Tij, Imzot Arundel and Brighton, përfaqësuar sot nga Mgr Kilvon Conry.

Hirësi, sikurse Ju e dini, Shën Kolli është shenjti më i dashur, qoftë prej katolikëve qoftë prej ortodoksëve. Në Shqipëri kemi shumë kisha të kushtuara Shën Kollit. Katolikët shqiptarë kanë një devocion të madh ndaj Shën Kollit dhe zakonisht, natën e festës, realizohen pajtimet mes familjeve që janë në gjak. Edhe për këtë, së bashku me të gjithë ju, e jetoj këtë moment me zemrën plot me mallëngjim e mirënjohje si dhe me ndjenja të një gëzimi të thellë. Nuk ka qenë e lehtë të gjejmë fondet për rindërtimin e kësaj kishe të kushtuar Shën Kollit... vetëm Zoti e di! Por ia vlente barra qeranë! Për mua, ajo është monumenti kushtuar fesë dhe heroizmit të “Martirëve tanë shqiptarë”. Shën Kolli na bëftë ta duam me gjithë zemër Jezu Krishtin dhe të jemi dëshmitarët e tij çdo ditë. Amen”.

 titujt kryesore

webmaster