NJË KURIA E RE E “LEGJIONIT TË MARISË”

Unë që po shkruaj jam Ernest Kalaj, president i Presidiumit të Legjonit të Marisë, Vukpalaj (Bajzë). Dëshiroj të flas mbi formimin e Kurias së sapoformuar në Malësinë e Madhe, të quajtur “Mbretëresha e Paqes”.

Takimi i parë i kësaj Kurie u bë me datën 4 tetor 2008 në ambientet e famullisë së Bajzës. Nuk ka qenë e lehtë arritja e krijimit të saj, por me mbështetjen e Zojës dhe nën nxitjen e Shpirtit Shenjt u arrit prania e kësaj lëvizjeje kishtare në zonën tonë. Një Kuria e re e Legjionit të Marisë, është e mundur atëherë kur numri i presidiumeve (grupeve) të këtë arritur në pesë e sipër. Por, duke parë gatishmërinë e motrave për t'u bërë ushtaret e saja, numri i tyre tashmë ka arritur në dhjetë dhe vazhdon të rritet çdo ditë. Unë dëshiroj të falënderoj në mënyrë të veçantë Motrën tonë Dilla e cila, me ndihmën e Nënës sonë Zojës së Bekuar dhe me mbështetjen e familjes së saj, ka bërë të mundur formimin e të gjitha këtyre presidiume. Që nga Kopliku e deri në Hot të Malësisë së Madhe kjo motër vazhdon ende të formojë grupe të tjera. Zoti ia shpërbleftë me të mirat e veta.

Për formimin e kësaj Kurie të re në Bajzë, falënderoj edhe meshtarin Dom Dritan Ndocin, drejtuesin shpirtëror të Legjionit të Marisë në dioqezën tonë. E falënderoj për sakrificën dhe punën e palodhshme që bën për Fjalën e Zotit. Krishti i rrittë pushtetin, Zoti e bekoftë dhe Zoja e mbushtë me hiret e veta.

Një falënderim të përzemërt edhe për Motër Luçie Preçi, presidenten e Kurias së Shkodrës, e cila ka sakrifikuar shumë si për formimin e presidiumeve në Kurian e Shkodrës, ashtu edhe për ato të Kurias sonë. Zoja e ndihmoftë gjithmonë dhe ia shpërbleftë me të mirat e veta.

Falënderojmë shumë edhe Atë Ndue Gashi, famullitar i Bajzës, për mbështetjen e tij dhe për ofrimin e ambienteve të famullisë së tij, vend ku ne një herë në muaj tashmë mund të lutemi së bashku.

Uroj oficerët e kësaj Kurie - motër Angje Shelinaj, presidente, vëlla Gegë Paloka, arkëtar, motër Luçe Asllani, sekretare, dhe motër Lula Celaj zv/presidente - që Zoti t'i bekojë e t'i ndihmojë në këtë shërbim që u është besuar. Zoti na ndihmoftë t'i shërbejmë Atij me gëzim dhe me gatishmëri.

Ernest Kalaj

 titujt kryesore

webmaster