Afrika: Çohu!

Nga homelia e Shenjtërisë së Tij Papa Benedikti XVI në Meshën e mbylljes së Asamblesë së dytë të veçantë për Afrikën të Sinodit të ipeshkvijve, më 25 tetor 2009, në Bazilikën e Shën Pjetrin, Romë.

Vëllezër të nderuar!

Të dashur vëllezër dhe motra!

Ja një mesazh shprese për Afrikën: sapo e dëgjuam nga Fjala e Zotit. Është mesazhi të cilin Zoti i historisë nuk resht kurrë së përsërituri ndaj njerëzimit të shtypur dhe të lodhur të çdo lloj epoke dhe vendi, qysh në kohën kur i zbuloi Moisiut vullnetin e vet mbi izraelitët skllevër në Egjipt: “E pashë mjerimin e popullit tim… e dëgjova britmën e tij… i njoh vuajtjet e tija. Kam zbritur për ta liruar… dhe ta çoj në një tokë ku rrjedh qumësht dhe mjaltë” (Dal 3, 7-8). Cila është kjo tokë? A nuk është Mbretëria e pajtimit dhe e drejtësisë, e paqes, ku është i thirrur i gjithë njerëzimi?

[...] Plani i Hyjit nuk ndryshon. Përmes shekujve dhe rrjedhës së historisë, Ai synon gjithnjë kah i njëjti cak: Mbretëria e lirisë dhe e paqes për të gjithë. E kjo përfshin parapëlqimin e tij ndaj atyre që nuk e kanë lirinë dhe paqen, ndaj atyre që janë të dhunuar në dinjitetin e tyre si persona njerëzor. Le të mendojmë në mënyrë të veçantë për vëllezërit dhe motrat që në Afrikë vuajnë varfërinë, sëmundje, padrejtësi, luftëra dhe dhunë, si edhe emigrime të detyruara. Këta bij të përzgjedhur të Atit qiellor janë si puna e të verbrit të Ungjillit, Bartimeu, i cili “ishte ulur përbri rrugës dhe lypte” (Mk 10, 46), në hyrje të Jerihonit. Pikërisht asaj rruge kalon Jezusi Nazaretas.

[...] Të dashur Vëllezër, ta falënderojmë Hyjin që ky “takim i mistershëm mes varfërisë sonë dhe madhështisë” së Tij është realizuar edhe për në Asamblenë sinodale për Afrikën që sot po mbydhet. Hyji e ka përsëritur thirrjen e tij: “Mos ki frikë! Çohu...” (Mk 10, 49). Edhe Kisha që është në Afrikë, nëpërmjet barinjve të vet, të ardhur nga të gjitha Vendet e Kontinentit, nga Madagaskari dhe nga ishuj të tjerë, e ka mirëpritur mesazhin e shpresës dhe të dritës për të ecur në rrugën që të çon kah Mbretëria e Hyjit. [...] Bartimeu që, pasi shërohet, e ndjek Jezusin në rrugën e Tij, është shëmbëllesë e njerëzimit që, i shndritur nga feja, nis udhëtimin drejt tokës së premtuar.

[...] “Mos ki frikë! Çohu...”. Kështu sot Zoti i jetës dhe i shpresës i drejtohet Kishës dhe popujve afrikanë, në përfundim të këtyre javë reflektimesh sinodale. Çohu, Kishë në Afrikë, familje e Hyjit, sepse po të thërret Ati qiellor, të cilin paraardhësit  tu e lusnin si Krijues, edhe para së ta kuptonin afërsinë e Tij të mëshirshme, e cila u dëftua në Birin e Tij të Njëlindur, Jezu Krishtin. Nise udhëtimin e një ungjillizimi të ri me kurajon që të vjen nga Shpirti Shenjt.

[...] Në këtë mision mjaft angazhues ti nuk je e vetme, o Kishë shtegtare në Afrikën e mijëvjeçarit të tretë. Ke pranë me lutjen dhe me angazhimin e saj tërë Kishën katolike dhe, nga Qielli, të shoqërojnë shenjtërit dhe shenjtëreshat afrikane që, me jetën e tyre – në disa raste deri edhe në martirizim – kanë dëshmuar një besnikëri të plotë ndaj Krishtit.

Mos ki frikë! Çohu, o Kontinent afrikan, tokë që ke mirëpritur Shëlbuesin e botës ku, si fëmijë, iu desh të strehohej në Egjipt së bashku me Jozefin dhe Marinë, për t'i ikur persekutimit të mbretit Herod.

[...] Virgjëra Mari nxjerrtë prej Zotit hirin që Kisha në Afrikë të rritet në çdo cep të këtij Kontinenti të madh, duke e shpërndarë në çdo vend «kripën» dhe «dritën» e Ungjillit.

    titujt kryesore

webmaster