Dom Gert Gjoni shugurohet Meshtar

Data 21 nëntor për Gerti Gjonin, do të mbetet një datë e paharruar në jetën e tij: si dita e shugurimit meshtarak, i cili bëhet në ditën e kushtimit të Zojës dhe në vigjiljen e festës së Krishtit Mbret, e kremte me të cilën mbyllen festat liturgjike për vitin 2009, për të vazhduar me katër të dielat përgaditore për lindjen e Jezu Krishtit.

Me pjesëmarrjen e një numri të madh besimtarësh, motrave të kongregatave të ndryshme, të nënës, vëllait, farefisit, Meshën e shenjtë e  udhëhoqi Shkëlqesia e Tij Imzot Angelo Massafra,  në bashkëkremtim me mbi 50 meshtarë të urdhrave të ndryshëm.

Në homelinë që mbajti me këtë rast, Prelati në fjalë, në fillim iu drejtua të pranishmëve dhe meshtarëve duke i përshëndetur si bari i Kishës dhe duke shprehur gëzimin se Kishës, veçanarisht në këtë vit të meshtarisë, po i shtohet dhe një tjetër meshtar i ri. Pastaj vazhdoi me detyrat që ka meshtari i ri në përhapjen e fesë, të cilin po e shuguron në këtë ditë të shënuar për Kishën në Shqipëri dhe përfundoi me porosinë për meshtarin e ri, të cilit po i ngarkohet detyra e re e veprës shenjtëruese të Krishtit.

Pas homelisë filloi riti i shugurimit meshtarak. Në fillim, Atë Armando Ceccarelli, Rektor i Seminarit, bëri propozimin dhe paraqitjen e diakonit për marrjen e urdhrit meshtarak. Ky i fundit i kërkoi Prelatit që të shuguronte meshtar diakonin, i cili i drejtoi kandidatit një sërë pyetjesh duke marrë më pas një premtim solemn: “PO, dua,” dhe “PO premtoj”. Pastaj kandidati është shtrirë përdhe, ndërsa besimtarët kanë rënë në gjunjë.

Pas këndimit të litanive të Shenjtërve, Prelati dhe meshtarët shtrinë duart mbi kandidatin për meshtar, i cili pranon të marrë dhuratën e shugurimit. Pastaj u bënë ritet esplikative, si veshja me stolën dhe kazulën të cilën ia veshi dom Dritan Ndoci. Dhe përqafimi i paqes në përfundimin e të cilit meshtari i ri vazhdon meshën të udhëhequr prej Prelatit.

Para përfundimit të Meshës u bënë falënderimet. Në fillim Dom Gjovalin Sukaj administrator -famullitar i famullisë së Shën Shtjefnit Shkodër,  e më pas edhe vetë meshtari i ri. Ndërkaq u lexua  edhe mesazhi që Selia e Shenjtë ia drejtonte meshtarit të ri. Mesha e shenjtë u shoqërua nga kori i rinisë        “Nënë Tereza”, i cili e mbylli këtë solemnitet me “Magnificat”. Mesha u transmetua edhe nga Radio Maria Shqiptare.

… dhe Mesha e parë.

Pasi ka bërë prezantimin para besimtarëve të Shkodrës në Meshën e datës 21 nëntor, në festën e Krishtit Mbret, dy ditë më vonë, më 23 nëntor, në orën 15.00,  Dom Gerti kremtoi Meshën e parë në kishën e Shën Gjon Pagëzuesit në fshatin Bilaj (Krujë). Në fillim të Meshës Atë Wojciech Porada, famullitari i kishës në fjalë, i uroi mirëseardhjen meshtarit të ri dhe i shprehu gëzimin e krejt  famullisë në këtë ditë. Ndërsa homelinë e rastit e mbajti Don Dritan Ndoci. Në fund falënderoi edhe meshtari i ri.  

Lec Zadeja

    titujt kryesore

webmaster