Enciklika “Caritas in Veritate” 

(Dashuria ne te Vertete)

Pas përkthimit dhe botimit, vitin e kaluar, të Enciklikës Populorum progressio (Zhvillimim i popujve), me rastin e 40 vjetorit të hartimit të saj, me plot gëzim po paraqes tani enciklikën Caritas in veritate, që është edhe Letra e tretë enciklike e shkruar nga Papa Benedikti XVI, e cila është nënshkruar prej Tij më 29 qershor dhe është botuar më 7 korrik 2009. Ajo ka në qendër zhvillimin e tërësishëm të njeriut në dashurinë dhe në të vërtetën.

40 vjet pas Enciklikës Populorum progressio të Papa Palit VI dhe 20 vjet pas Enciklikës Sollicitudo rei socialis të Papa Gjon Palit II, kjo Enciklikë shoqërore ka për qëllim ta kujtojë dhe ta bëjë aktual mësimin e Enciklikës Populorum progressio. Duke u nxitur nga një lexim i kësaj të fundit, Enciklika Caritas in veritate përditëson termat e krahasimit mes doktrikës shoqërore të Kishës dhe ndryshimeve në epokën e globalizimit: “Pali VI e ka ndriçuar temën e madhe të zhvillimit të popujve me shkëlqimin e të vërtetës dhe me dritën e këndshme të dashurisë së Krishtit. Ai ka pohuar se lajmi i Krishtit është faktori i parë dhe kryesor i zhvillimit dhe na ka lënë misionin që të ecim në rrugën e zhvillimit me gjithë zemrën tonë dhe me gjithë inteligjencën tonë (...) dua ta nderoj kujtimin e Papës së madh Pali VI, duke marrë mësimet e tij mbi zhvillimin njerëzor të tërësishëm” (nr. 8).

Pra, mund të thuhet se perspektiva e Enciklikës Populorum progressio zgjerohet në Enciklikën Caritas in veritate, në vazhdimësi të dinamikave të thella që Enciklika e Palit VI paraqet. Në veçanti, thellohet koncepti i 'zhvillimit të tërësishëm të njeriut'. Në fakt, tema qendrore e Enciklikës së Papa Benediktit XVI është 'zhvillimi i popujve në dashurinë dhe në të vërtetënë'. Atëherë, Enciklika Caritas in veritate thekson, si temë kryesore, që zhvillimi i tërësishëm i njeriut do të jetë i mundur në atë masë në të cilën veprimtaritë e orientuara për zhvillim do të udhëhiqen nga dashuria dhe e vërteta.

Shqetësimi kryesor i Enciklikës është ai i vazhdimësisë dogmatike të mësimit: “Doktrina shoqërore e Kishës ndriçon me një dritë që nuk i ndryshon problemet gjithmonë të reja që dalin në pah” (nr. 12). Për sa u përket risive të kontekstit shoqëror botëror, Enciklika Caritas in veritate thekson se si kriza financiare që ka goditur ekonomitë e botës vë në dukje nevojën e një marrëdhënieje korrekte mes etikës dhe ekonomisë, si edhe tregon brishtësinë e modeleve liberistike, të cilat bëjnë të mundur që të mungojnë totalisht rregullat e botës së punës.

    titujt kryesore

webmaster