Famullitari i ri ne Breg-Puke

Të dielen e XXIX gjatë vitit, në ditën e Shën Lukës ungjilltar, datë 18.10.2009,  me rastin e pranim-dorëzimit të Famullisë së Shën Eufemisë u kremtua mesha e shenjtë në fshatin Breg të rrethit të Pukës. Në këtë kremtim mori pjesë Ipeshkëvi i vendit Imzot Lucjan Avgustini bashkë me ish-famullitarin  Dom Giovanni Fiochin, famullitarin e ri, Pader Andres Waltermann, si dhe populli i Zotit.

Të gjithë jemi të pagëzuar kemi marrë hirin e shenjtërimit. Me lyerjen shenjte jemi vulosur dhe jemi bërë gjymtyrë të Krishtit meshtar, profet dhe mbret. Në këtë lidhje gjymtyrësh me Krishtin ne duhet ta gjejmë angazhimin dhe dërgimin tonë në botë. Kështu është shprehur Imzot Lucjan Avgustini në predikimin e rastit. Në shenjë falenderimi për punën e kryer deri më sot të Dom Giovanni Fiochit si dhe me rastin e pranimit të detyrës së famullitarit të ri Atë Andres Waltermann, ai  theksoj edhe disa fjalë mbi meshtarinë. Meshtaria është kusht i pashmangshëm për kremtimin e vlefshëm të Eukaristisë. Në të vërtetë “në shërbimin kishtar të mbarështuesit të shuguruar është vetë Krishti që është i pranishëm në Kishën e vet, si Krye i trupit të vet, Bari i grigjës së vet, Kryemeshtar i flisë shëlbuese”. Sigurisht, mbarështuesi i shuguruar “vepron në emër të të gjithë Kishës kur ia paraqet Hyjit lutjen e Kishës dhe sidomos kur kushton flinë eukaristike”.

Ndërkaq, besimtarët dhe Ipeshkëvi falenderuan Dom Giovannin për kujdesin e tij baritor në këtë famulli i cili, që prej 10 vjetësh punoi me zemër dhe dashuri ndaj besimtarëve të kësaj famullie, dhe i premtuan se do ta kujtojnë në lutje në mënyrë që kudo që të shërbejë t'i kushtohet punës me zell dhe dashuri për Zotin dhe të mirën e Kishës.

Në këtë kremtim nuk mungoi edhe urimi për mirëseardhjen e meshtarit të ri Atë Andres Waltermann duke i dëshiruar bekimin e Zotit në punën baritore duke i besuar këtë grigjë që t'i ushqejë me Fjalën e Zotit, t'ju ndajë sakramentet dhe bekimet që kanë nevojë, si dhe t'i mësojë dhe t'i edukojë në mësimin e Krishtit dhe të Kishës.

Violeta Marashi

    titujt kryesore

webmaster