Festohet 80-vjetori i lindjes se Moter Maria Kaletes (Stigmatine)

Bashkësia famullitare e famullisë Shën Nikolli në Pistull, me datën 11.11.2009, mes emocioneve të shumta, me një kremtim solemn ka përkujtuar 80-vjetorin e lindjes së Motrës Stigmatine Marie Kaletës. Në këtë përvjetor nderoi me pjesëmarrjen e tij Ipeshkvi i vendit, Imzot Lucjan Avgustini, i cili udhëhoqi Meshën Shenjte në bashkëkremtim me famullitarin Dom Vinçens Palin dhe meshtarë të tjerë, me një pjesëmarrje të gjerë të  popullit të Zotit, të bashkësisë së motrave Stigmatine në Shqipëri bashkë me Superioren Motër Chiara Pieri, si dhe miq e të afërm të motër Maries. E veçanta e këtij përvjetori ishte edhe 67 vjetori i kushtimit të motër Maries me jetë rregulltare në familjen e motrave Stigmatine, në shërbim të Zotit dhe njeriut.   

Nuk dëshiroj të flas për jetën e motrës Marie, apo siç e thërrasin i gjithë fshati, të hallës Marie, tha Imzot Lucjani në fillim të predikimit të rastit, sepse shumë prej jush e njihni më mirë se unë.  Por ai u ndal në disa mendime, në të cilat lidhet dhe jeta e kushtuar si motër stigmatine. Në realizimin e planit të shpërblimit, Hyji ka dashur të kërkojë bashkëpunimin e njeriut. Shkrimi i Shenjtë e tregon historinë e shëlbimit si një histori thirrjesh, në të cilën gërshetohen nisma e Zotit e përgjigjja e njerëzve. Çdo thirrje lind prej takimit të dy lirive: asaj hyjnore dhe asaj njerëzore, e në çdo thirrje Hyji zbulon kuptimin e thellë të Fjalës. Pra Jezu Krishti, Fjala e Atit, është ikona për të kuptuar thirrjen e çdo njeriu, për të verifikuar ecjen e tij të jetës dhe për t'i dhënë frytshmëri shpirtërore misionit të tij. Imzot Lucjani vuri në dukje edhe fjalët e Shën Palit “Për mua Krishti është jetë!” E besoj se këto fjalë mund t'i adoptojmë edhe në jetën e motrës Mari.

Motër Marie Kaleta ka lindur në Shkodër me 10 Nëntor 1929, është rritur në Nënshat dhe në moshën 7 vjeçe bashkë me familjen e saj u vendos me banim në Pistull. Ishte mbesë e meshtarit Dom Ndoc Sumës, që sot është në proces të kanonizimit të martirëve të Kishës Katolike në Shqipëri. Me dëshirën e madhe për të ndjekur Krishtin, që në moshë fare të vogël, kur ishte 10 vjeçe, ajo hyn në kuvendin e motrave Stigmatine në Shkodër, pikërisht me  datën 11 dhjetor të vitit 1940. Mbasi jetoi për 7 vjet në këtë kuvend, erdhi çasti fatal për të ku ajo u kthye në shtëpi për arsye të mbylljes së kuvendit në  vitin 1946. E po në të njëjtin vit i arrestojnë edhe xhaxhain, Don Ndoc Sumën, i cili në atë kohë ishte famullitar në Pistull. Por plani i Zotit në mirësinë dhe dashurinë e vet, ka dashur që Motër Maria të bëhet një shërbëtore e Tij, të jetë një dëshmitare e gjallë e fesë së Krishtit, pa marrë parasysh vuajtjet dhe pengesat  e mëdha që u krijuan nga sistemi totalitar ateist. Motër Maria e përjetoi edhe më tepër dashurinë e Zotit, kur ajo ndante sakramentet shpi për shpi, e pa pagëzu s'ka lanë asnjë fëmi. Atë fe të madhe që Motër Maria ka pasur për Jezu Krishtin, me aq mundësi sa kam pasur, ka kërkuar ta ushtrojë mund të them ilegalisht, duke vënë edhe jetën në rrezik kur shkonte dhe takonte meshtarët në burg, u çonte njetet e meshëve që i jepshin besimtarët, si dhe  osten dhe verën në mënyrë që meshtarët t'ia paraqitnin Zotit flinë për mbarë popullin shqiptar.  Këtë besim dhe dashuri ndaj Zotit nuk ka mundur askush t'ia marrë e aq më tepër t'ia zhdukë nga jeta e saj. E pas shumë vuajtjesh, me rihapjen e kishave në vitin 1991, Motër Maria Kaleta bashkë me 28 vajza, që kishin mbetë, ish murgesha nga e gjithë Shqipëria bashkohen në ish ambjentet e Kuvendit të Stigmatineve, për të nisur kështu jetën e re në emër të Krishtit dhe me Krishtin. Sot ajo shprehet e kënaqur që ka arritur ta shohë lirinë duke gëzuar kështu çdo moment të ditës në lutje, uratë dhe shërbim të Zotit në mesin e të gjithë atyre që e duan dhe e kërkojnë Zotin

    titujt kryesore

webmaster