E KREMTE MADHËSHTORE NË LAÇ TË KURBINIT

13 qershor, festa e Shën Antonit

Ata që e njohin, ata që i kanë përjetuar mrekullitë e tij, mezi e presin festën e tij. Por edhe të tjerë, të cilët vetëm kanë dëgjuar për të, e përjetojnë praninë e tij në mënyrën e tyre. Mjafton të besosh, të kërkosh ndërmjetësinë e tij tek Hyji dhe zemra e shpirti qetësohen.

Tashmë të gjithë e njohin dhe e dinë se kush është ai shenjt i madh, shenjti i botës, shenjti mrekullibërës në të gjithë popujt, i cili jetoi nga 18 gusht 1195 - 13 qershor 1231

Festa e tij mbledh rreth vetes mijëra e mijëra njerëz në nderim të tij, por edhe çdo ditë e marte është e mbushur me lutje drejtuar këtij shenjti të madh. Një privilegj të veçantë në këtë ditë feste, por edhe gjatë të marteve (sidomos gjatë 13 të marteve para festës) e ka qyteti i Laçit, i cili me kënaqësi i mikpret besimtarët e vendeve të ndryshme të Shqipërisë.

Edhe këtë vit, qyteti nuk ishte në gjallëri vetëm ditës e festës së 13 qershorit, por edhe në çdo të marte e të shtune, kur besimtatët kanë shtegtuar drejt vendit të shenjtë. Me rastin e kësaj feste ishte treditëshja gjatë së cilës besimtarët e kanë vazhduar shtegtimin e tyre deri një ditë pas festës. Gjatë kësaj kohe, pa u lodhur, kanë punuar Fretërit Minorë Françeskanë, të cilët u janë përkushtuar të gjithë besimarëve pa dallim, me këshilla, sugjerime e bekime.

Natën dhe ditën e festës, jo vetëm sheshi, por edhe kodrat përreth Shenjtërores ishin mbushur plot me njerëz, të cilët kishin ardhur nga të gjitha anët e vendit. Përveç meshtarëve françeskanë, për t'u ardhur në ndihmë ishin të pranishëm edhe meshtarë të tjerë. Meshën e natës në orën 1200, e kremtoi don Nikolin Toma, i cili kishte ardhur nga Shkodra. Gjatë predikimit ai iu drejtua besimtarëve me fjalë shumë të rëndësishme. Mes të tjerave ai tha: “Kemi ardhur nga Konispoli e nga Vermoshi dhe jemi bashkuar të gjithë për një qëllim: që ta adhurojmë Zotin, por edhe ta nderojmë dhe ta respektojmë këtë shenjt të madh, Shën Antonin. Kemi ardhur me njete e nevoja të ndryshme që t'i shprehim përpara këtij shenjti. Ky shenjt na mëson siç na ka mësuar edhe vetë biri i Hyjit që ta duam njeri  tjetrin, sepse të gjithë jemi krijesa të Zotit, jemi shëmbëllesa e Tij, krijesa më e bukur e Tij”. Këto dhe fjalë të tjera të tij, populli i dëgjoi me shumë kënaqësi.

Meshën kryesore në orën 1100,  në ditën e festës, e udhëhoqi arqipeshkvi Imzot Rrok Mirdita në bashkëkremtim me meshtarë të tjerë. I pranishëm ishte edhe Provinciali Françeskan, Atë Nue Gashi, i cili kishte qenë gjatë gjithë kohës i pranishëm në ndihmë të besimtarëve.

Arqipeshkvi tregoi se me kënaqësi kishte pranuar ta kremtonte Meshën e festës në këtë vend të shenjtë. Ai iu drejtua besimtarëve me fjalë vërtet të bukura: “Shën Antoni nuk ka lindur shenjt, por është bërë i tillë gjatë jetës së tij, duke ndjekur ligjet dhe urdhërimet e Zotit. Edhe ne jemi të thirrur për t'u bërë të shenjtë dhe për këtë të marrim shembull prej këtij Shenjti. Mos të mbledhim pasuri të kësaj bote, të cilën e bren ndryshku dhe krimbat, por të mbledhim visare për jetën e pasosur.”

Në shenjtërore gjatë këtyre ditëve, pa ndërprerje, përveç Meshëve, ka pasur edhe bekime e lutje, të udhëhequara nga diakonat françeskanë. Ndërsa në Liturgji ndihmuan motrat “Bijat e Dashurisë Hyjnore” me disa fëmijë të famullisë dhe novicet e ardhura nga Shkodra. Nga Shkodra kanë qenë të pranishëm edhe një grup vullnetarësh, të cilët kanë vepruar e kanë ndihmuar gjatë këtyre ditëve. Bashkë me ta ishin të pranishme eshe dy motra të bashkësisë së “Krishtit Fëmi”. Të gjithë punuan pandërprerë dhe pa u lodhur në shërbim të të gjithë njerëzve, të cilët ishin të pranishëm gjatë këtyre ditëve.

Ishte gjë shumë e bukur tek shihje gjithë ata njerëz që shtegtonin duke ardhur nga rrugë e drejtime të ndryshme drejt një vendi të vetëm, drejt kishës së shenjtit të gjithë botës, Shën Antonit.

 Bijat e Dashurisë Hyjnore, Laçi i Kurbinit

maj -qershor 2005

webmaster