SUKAJ-DAJÇ, BREGU I BUNËS - BEKOHET KISHA E RE

Dita e 11 qershorit të këtij viti për besimtarët e Sukaj  Dajçit të famullisë së Dajçit të Bregut të Bunës, do të mbetet e paharruar. Në këto ditë, këto, së bashku me miq të ardhur nga fshatrat përreth, nga SHBA, Italia, Kosova, morën pjesë në bekimin e kishës së re të ndërtuar që nga themelet, me ndihmën e pakursyer të bashkëfshatarëve të tyre që aktualisht jetojnë e punojnë në Amerikë.

Kisha është e bukur, ka të gjitha mjediset, kumbonaren, këmbanat, që më tepër se kurrë këto ditë jehuan duke dhënë lajmin e gëzueshëm të bekimit të këtij objekti kulti, të cilin ebëri Shkelqësia e tij, Imzot Angelo Massafra, Arqipeshkëv Metropolit i Kryedioqezës Shkodër  Pult, duke udhëhequr Meshën e shenjtë, në bashkëkremtim me famullitarin e Dajçit, Dom Gjergj Simonin. Ky i fundit, para fillimit të meshës, do ta falenderonte Shkëlqesinë në fjalë, të pranishmit dhe do të tregonte në vija të përgjithshme se si filloi ndërtimi i kishës dy vite më parë, di u gjetën donatorët, mjeshtrat, etj. nga ana tjetër, famullitari do të lajmëronte Imzot Massafrën se në famullinë të cilën ai e drejton , kishte tre vjet që nuk rregjistrohej ndonjë ngjarje e jashtëzakonshme. Falenderimin do ta mbyllte me porosinë e Atit të Shenjtë, Papës Benediktit XVI, dhënë në Kongresin e mbajtur kohët e fundit në Bari të Italisë për shenjtërimin e ditës së diel. Njëkohësisht falenderimet më të përzemërta ia drejton edhe donatorëve, popullit që nuk kurseu asgjë për ta përfunduar këtë kishë,  menjëherë filloi ceremonia e bekimit të ujit nga Arqipeshkëvi, me të cilin u bekua ndërtesa brenda dhe jashtë, si dhe besimtarët e pranishëm.  Pastaj vazhdoi Mesha e shenjtë dhe në homelinë e mbajtur nga prelati në fjalë, vihet në dukje  në fillim gëzimi  që ai e ndiente ai dhe duke marrë pjesë në bekimin e kësaj kishe të re dhe në domethënien e ungjillit të ditës kur bëhet fjalë për ndërtimin e një kishe të re në 3 ditë, që ka si kuptim vdekjen dhe ringjalljen e Jezusit. Pastaj, ndërtimin e kësaj kishe e lidhi me sa e sa kishë të reja që janë ndërtuar në këto vitet e fundit, duke zëvendësuar ata kishë që u prishën gjatë diktaturës në Shqipëri. Për këtë kërkonte që të gjithë ta falenderonin Zotin. Një falenderim tjetër ua drejtoi donatorëve, famullitarit, Atit të Shenjtë, si dhe përshëndeti autoritetet që ishin të pranishëm. Duke iu drejtuar besimtarëve, theksoi se Kisha është e tyre, prandaj ajo duhej frekuentuar, ashtu siç porosiste kohët e fundit Ati i Shenjtë.

Edhe në këtë ceremoni, prelati shprehu shqetësimin që ka sot Kisha për thirrje të reja, duke dëshirruar që edhe në këtë fshat duhej të kishte thirrje të tilla për meshtarë e për motra rregulltare. Duke përfunduar porositi që duhet të punojmë për të ndërtuar Kishën shpirtërore, të vazhdojmë zbatimin e detyrave që shtron viti 2005, si viti i Eukaristisë, të kemi dashuri dhe e mbylli me fjalët: “E gëzofshi këtë kishë të re!”

Pas homelisë vazhdoi mesha me bekimin e altarit të ri, të trupores së Shën Kollit, të cilit i kushtohet kisha në fjalë dhe të truporeve të shenjtërve të tjerë, të vendosura në këtë kishë. Para përfundimit të Meshës u bënë falenderime edhe në adresë të Shkëlqesisë, të donatorëve, të projektuesve e zbatuesve e të gjithë atyre që dhanë shuma të mëdha dollarësh për ndërtimin e saj, të famullitarit, që i është gjendur pranë dhe dhunë e shumë të tjerëve.  Në fund prelati dha bekimin dhe besimtarët u shpërndanë duke ruajtur mbresa e kujtime për këtë ditë të shënuar për ta.

Në ceremoninë e bekimit nderonin me pjesëmarrjen e tyre deputetë dhe kryetari i Komunës Dajç Bregut të Bunës, e gjithë ceremonia u përcoll nga kori i të rejave të fshatit.

Me këtë rast për të ftuarit, u shtrua një tryezë familjare në Bar  Restorant “Marçelo”  Bajzë, me pronar Popaj.

Lec Zadeja

maj -qershor 2005

webmaster