BASHKËSIA KATOLIKE SHQIPTARE  ROMË

Mbi rëndësinë e një qendre katolike në Romë

Numri i madh i pranisë shqiptare në qytetin e Romës dhe provinca (sipas Dosierit të fundit të Caritas, janë më shumë se 5.000), një rritje e aspektit fetar edhe si rrjedhojë e integrimit në shoqërinë italiane, janë premisat më të mira për të menduar një projekt të mirëfilltë në qytetin e Romës nëpërmjet pranisë së bashkësisë katolike në zemër të qytetit.

Tradicionalisht, bashkësitë e emigrantëve nëpër botë e në veçanti ato katolike kanë qënë qëndra të vërteta të një rritjeje fetare e social  kulturore që kanë influencuar jo vetëm mjedisin ku ndodheshin, por edhe shumë aspekte në Shqipëri.

Misioni katolik shqiptar, si një qendër e mirëfilltë, ka për qëllim njeriun total në të gjitha aspektet e tij. Për këtë një ndërhyrje fetare duhet shoqëruar me një tjetër, jo më pak të rëndësishme, në aspektin social  kulturor.

Nuk bëhet fjalë për të krijuar një “fole” apo “geto” ku shqiptarët të ndihen të mbrojtur nga mjedisi i jashtëm. Integrimi i emigrantëve ka qënë mesatarisht mëse i arritur. Një qëndër e tillë ka për objektiv formimin dhe edukimin fetar duke kaluar edhe nga organizimi i aktiviteteve të ndryshme social  kulturore.

Disa projekte për bashkësinë

A. Qendra e dëgjimit dhe orientimit (Centro d'ascolto).

Kryen një shërbim të çmueshëm ndaj kërkesave të ndryshme për informacion (çështje legale, punësimi, strehimi, ndihme mjekësore…). Shumë vështirësi fillestare lindin për mungesë informacioni. Krijimi i një rrjeti të tillë do ndihmonte shumë edhe në njohjen më të mirë të realitetit të emigrantëve. Mund të jetë edhe një qendër që e hap aktivitetin e saj në favor edhe të disa aspekteve problematike si burgjet, prostitucioni, të miturit, shkollat, universitet… me qëllimin parësor që të krijojnë ura lidhjeje mes “kërkuesve ndihmë” dhe institucioneve që mund të ofrojnë përgjigje konkrete kur është e mundur. Thjesht informacioni kthehet në një mundësi më tepër për të përballuar situatat e vështira.

B. Sekretaria

Një aktivitet i tillë që kërkon edhe mbajtjen e informacioneve si adresa, nr. telefoni, kontakte të ndryshme apo skeda personale, por edhe nevoja për të kryer shërbimet e kontakteve me anëtarët e bashkësisë, mirëbajtja dhe përgatitja e dokumentave apo shkresave të ndryshme, etj, bëjnë të nevojshme krijimin e një sekretarie (edhe part  time).

C. Buletini mujor

Një mënyrë konkrete për të lidhur realitetin roman por edhe bashkësitë e tjera katolike nëpër Itali, por edhe impenjimi i laikëve në një projekt konkret. Ja cilat mund të jenë disa prej qëllimeve të këtij publikimi:

- Informim: iniciativa, jeta e bashkësisë, aspekte të ndryshme që lidhen me migrantët shqiptarë, etj

- Formim: një mënyrë dhe një vështrim ndryshe mbi probleme që lidhen me praninë shqiptare në Itali, nxitjen e një ndërgjegjësimi shoqëror e fetar

- Rrjet: njohja e realitetit katolik shqiptar jo vetëm në Romë, bashkëpunimi me realitete të tjera, etj.

Redaksia qendrore mund të jetë si fillim e përbërë prej 4  5 vetash. Në këtë pikë mund të ketë bashkëpunim: një mundësi konkrete për të ushtruar kompetencat, njohuritë sipas mundësive që kanë emigrantët edhe si rivlerësim i tyre në një mjedis që jo shpesh i detyron të bëjnë punë që s'lidhen fare me profesionin e tyre kërkohet edhe ndihma e gazetarëve të Radio Vatikanit apo realitete të tjera editoriale shqiptare në Romë.

D. Qendra kulturore

Është traditë që mjediset katolike kanë qenë frymëzuese, nxitëse dhe mbështetëse të një rritjeje jo vetëm shpirtërore por edhe intelektualo  kulturore. Mundësia e një qendre fizike me një mjedis larg qarqeve politike apo interesave ekonomike është më se e favorshme për të propozuar një Qendër të mirëfilltë kulturore shqiptare.

Muzika, por edhe zhanre të tjera artistësh, aktivitete kulturore, organizimi i konferencave apo prezantimeve etj. etj, që ndihmojnë jo vetëm për një njohje më të mirë të realitetit shqiptar dhe paraqitjes së tij, por edhe një mundësi më tepër për individë apo grupe për t'u prezantuar dhe për të pasur mundësinë që të shprehin njohuritë e tyre (prezantimi i një libri, një filmi, tema të ndryshme, ekspozita  salla poshtë është ideale për aktivitete të tilla  koncerte për raste të veçanta etj). Bashkëpunimi në këtë aspekt me realitete të tjera të ngjashme (shoqata, universitarë, etj).

Nuk do ishte keq ideja e një biblioteke me libra shqip apo për Shqipërinë që mund t'i kërkohen edhe në formë donacioni botuesve të ndryshëm apo të sigurohen me financime.

Kjo qendër mund të ofrojë edhe kurse në gjuhën italiane (kaq e rëndësishme për integrimin) dhe në gjuhën shqipe.

Një propozim për emrin

Qendra Kulturore mund të marrë emrin MIKEL KOLIQI për disa arsye: figurë intelektuale e njohur në mjedise katolike e jo vetëm në Shqipëri, por edhe një njohje e tij në Itali, sidomos pas emërimit së tij kardinal, muzikant dhe kompozitor, njohës i mirë i letrave shqipe, me një kulturë të gjerë, dhe si nxitës i shumë aktiviteteve kulturoro  shoqërore gjatë jetës së tij.

I gjithë aktiviteti i Misionit Katolik duhet të jetë krejtësisht pa qëllim fitimi dhe shërbimet krejtësisht falas (financimet janë një tjetër aspekt).

Sigurisht njerëzit e gatshëm dhe të përgatitur nuk mungojnë.

Objektivi: T'i japësh një mundësi shprehëse dhe t'i aktivizosh duke përcjellë vlerat njerëzore e të krishtera. Sigurisht nuk bëhet absolutisht fjalë për një qendër sociale por për një Mision Katolik që ka në zemër problemet tërësore që ndeshin sot emigrantët dhe i përgjigjet sfidave me propozime konkrete.

Kjo mënyrë organizimi është bërë tashmë praktikë mëse e provuar edhe në misione të tjera si në Romë ashtu edhe jashtë saj.

mars - prill 2005

webmaster