NGA VDEKJA NË RINGJALLJE

Kthehuni e besoni Ungjillit!  Ishin këto fjalë të cilat u shqiptuan nga goja e meshtarëve ditën e të Mërkurës së Përhirë, teksa shënonin në ballin e besimtarëve kryqin me hi e që do të ishin një shenjë për fillimin e kohës së Kreshmeve, kohë në të cilën çdo besimtar katolik ishte i thirrur që të përkujtonte dhe të jetonte mundimet dhe vdekjen e Zotit tonë Jezu Krishtit. Këto gjashtë javë do t'i ftonin besimtarët në agjërim trupor e shpirtëror, në mënyrë që të ishin të gatshëm për të kremtuar ringjalljen e Tij.

Java e Madhe do të përjetohej më shumë në jetën e çdo besimtari, kjo për vetë kremtimet të cilat i parashikon Liturgjia e javës.

Kremtimi i së Enjtjes së Madhe do të fillonte me Meshën e shenjtë të orës 10.00, e cila u kremtua nga Imzot Angelo Massafra në bashkëkremtim me të gjithë meshtarët e kryedioqezës së Shkodrës, Meshë kjo e bekimit të vajrave. Pasdite në orën 17.00 u kremtua Mesha e Darkës së Fundit, në përkujtim të darkës së fundit të Zotit tonë Jezu Krishtit dhe të themelimit të Eukaristisë e të Meshtarisë. Mesha e kremtua nga Imzot Angelo Massafra, i cili do t'u lante këmbët 12 ministrantëve, veprim të cilin vetë Jezu Krishti e bëri me 12 apostujt për t'u treguar atyre se ishin të thirrur për të qenë shërbëtorë e jo zotërinj në shpalljen e Lajmit të Mirë. Në mbrëmje nga ora 21.00 - 24.00 do të pasonin lutjet e adhurimit të së Shenjtërueshmit Sakrament.

Të Premten e Madhe në orën 12.00 u lut Udha e Kryqit, drejtuar nga Famullitari i Shkodrës Mons. Lucian Avgustini dhe grupi i të rinjve “Mësues ku banon”. Kremtimet e pasdites do të fillonin në ora 15.00 me Liturgjinë e fjalës, gjatë së cilës u bë leximi i mundimeve të Jezu Krishtit. Më pas u vazhdua me zbulimin e kryqit nën thirrjen “Ja kryqi i Krishtit”, “Ejani e ta adhurojmë” dhe puthjen e tij. Pasoi marrja e kungimit nga besimtarët dhe e gjithë Liturgjia u përjetua me një përshpirtëri të madhe nga të gjithë besimtarët e pranishëm në katedrale.

E Shtuna e Madhe ka filluar me lutjet në heshtje, duke përkujtuar orët e Krishtit në varr. Gjatë gjithë ditës, në oraret e paracaktuara më parë, besimtarët janë drejtuar drejt kishave për të bërë bekimin e bukëve dhe të ushqimeve të tjera. Në mbrëmje kremtimi i Meshës së Vigjiljes së Pashkëve do të fillonte në orën 23.00 me bekimin e zjarrit në oborrin e katedrales, zjarr ky nga i cili do të ndizej qiriu i Pashkëve. Më pas me anë të tij janë ndezur edhe qirinjtë e besimtarëve. Gjatë Meshës, kanë marrë sakramentet e pagëzimit dhe të krezmimit 10 katekumenë, pasi kanë shpallur besimin e tyre së bashku me nunët e nunat dhe të gjithë besimtarët e pranishëm në katedrale.

“Për shumë vjet Pashkët!” “Alleluja, Krishti u ngjall!  Me të vërtetë u ngjall!”. Me këto përshëndetje ka aguar dita e diel, të cilat janë shqiptuar nga goja e besimtarëve për të përshëndetur njëri-tjetrin, në këtë ditë të ringjalljes së Krishtit. Këto përshëndetje janë shqiptuar edhe gjatë Meshës së orës 10.00, kremtuar nga Imzot Angelo Massafra, njëkohësisht edhe gjatë Meshës së orës 7.30 dhe 18.00. Këngës të gëzueshme të këmbanave u është bashkuar edhe refreni kumbues “Alleluja,  Alleluja, Alleluja!”.

Atmosfera dhe këngët e gëzueshme e Pashkëve kanë vazhduar edhe gjatë ditëve të tjera.

Motrat Engjëllore të Shën Palit,  Shkodër

mars - prill 2005

webmaster