FIRMOSET PAQJA FETARE

Tiranë, 18 Mars 2005

Kryetarët e katër komuniteteve fetare në Shqipëri, atij katolik, ortodoks, mysliman dhe bektashi, nënshkruan Deklaratën e Angazhimeve të Përbashkëta. Kryetari i Komunitetit Mysliman, Haxhi Selim Muça, Kryepeshkopi i Tiranës, Durrësit dhe i gjithë Shqipërisë, Fortlumturia e Tij, Anastasi Janullatos, Shkëlqesia e Tij Monsinior Rrok Mirdita dhe kryegjyshi botëror Haxhi Dedë Reshat Bardhi, firmosën të parën deklaratë publike, ku angazhohen për vazhdim dhe promovim të një atmosfere paqësore brenda komuniteteve fetare. Ata theksuan në prani edhe të Kryeministrit Fatos Nano, se “predikimi në asnjë rast nuk duhet të nxisë urrejtje fetare”. Ndërkohë, shefi i qeverisë shqiptare, në përshëndetjen e tij, tha se kjo firmosje vjen në kohën e duhur: në kohën e ripërtërirjes dhe të konsolidimit të institucioneve të lirisë së besimit, në një hap me zhvillimin e shoqërisë sonë demokratike e civile dhe me konsolidimin e shtetit ligjor dhe të marëdhënieve të Shqipërisë, në botën e qytetëruar”. Ndërsa, Emili Kruniç, drejtore Rajonale e Konferencës Ndërkombëtare “Fetë për paqe”, tha se “është një fakt i njohur që komunitetet shqiptare të Shqipërisë kanë vuajtur shumë për katër dekada, por pavarësisht nga këto vështirësi, gjithsesi komunitetet fetare ishin në gjendje të krijonin një traditë mirëkuptimi shumë tolerant”.

Angazhimet e komuniteteve fetare:

 Ne do të vazhdojmë t'i përkushtohemi lutjeve për të ushqyer tolerancën, bashkëjetesën dhe paqen, si në komunitetet tona, ashtu dhe për të gjithë shoqërinë shqiptare. Ne angazhohemi gjithashtu të vazhdojmë të promovojmë një atmosferë paqësore brenda komuniteteve tona, duke ua theksuar klerikëve tanë se predikimi në asnjë rast nuk duhet të nxisë urrejtje fetare.

 Do të vazhdojmë të edukojmë të tërë, që të mirëkuptojnë dhe respektojnë traditat tona të ndryshme fetare, në nënyrë që të parandalojnë mosdijen dhe frikën, nxitjen e diskriminimit dhe dhunës. Për këtë qëllim duhet të kemi sigurinë se programet dhe tekstet shkollore trajtojnë çdo fe në mënyrë të barabartë dhe të hapur.

 Do të vazhdojmë të jemi të hapur për bashkëpunim me organizata të tjera, civile e sociale, për të realizuar veprimtari të përbashkëta, për të cilat jemi të interesuar.

 Do të vazhdojmë të bashkëpunojmë me anën e takimeve të ndërsjellta për ruajtjen dhe promovimin e mirëkuptimit fetar në Shqipëri e rajon.

 Do të vazhdojmë të angazhohemi për gjetjen e mjeteve për të siguruar ndihmesë për ata që vuajnë në mënyra të ndryshme në shoqërinë tonë.

Komunitetet fetare u bëjnë thirrje autoriteteve:

 Të mbrojnë lirinë e të gjithë përfaqësuesve të autorizuar ose udhëheqësve fetarë, që të përmbushin misionin e tyre.

 Të mbrojnë komunitetet fetare tradicionalë nga çdo person apo grup (brenda dhe jashtë komunitetit), i cili kërkon të uzurpojë emrin, pronat, simbolet apo vulën e komuniteteve fetare. Në raste të tilla, mendojmë se është e domosdoshme ndërhyrja energjike e shtetit, në favor të mbarëvajtjes së veprimtarisë së këtyre komuniteteve.

 Të sigurojnë mbështetje për zhvillimin e një shoqërie të fuqishme civile, duke përshtatur ligje, rregulla financiare dhe politika të tjera, që të sigurojnë kushtet e duhura për zhvillimin e mëtejmë të komuniteteve fetare.

Të promovojnë dhe praktikojnë në vijueshmëri demokracinë, të drejtat e njeriut dhe shtetin ligjor.

 Të punojnë për rezulutën mbi statusin ligjor të komuniteteve fetare për t'u kthyer atyre pronat që iu shtetëzuan apo konfiskuan në të shkuarën.

 Të zhvillojnë në media praktika të tilla, të cilat nuk përçajnë, nuk bëjnë thirrje për mosbesim dhe armiqësi ndërmjet njerëzve, por mund të kontribuojnë për të ndërtuar një shoqëri të shëndetshme demokratike.

Në këtë kuadër ne i bëjmë gjithashtu thirrje medias të jetë e drejtë dhe e respektueshme në trajtimin e temave fetare.

Marrë nga gazeta Ballkan, Mars 2005

mars - prill 2005

webmaster